Terá lugar ata o vindeiro xoves nas pistas situadas en Vista Alegre (Ordes)
Arredor de 60 atletas da comarca ordense, entre persoas adultas e menores de idade, participan dende o día de onte no V Campus de Atletismo.
Ata o próximo xoves as pistas de atletismo situadas a carón do campo de fútbol de Vista Alegre acollerán probas de velocidade con e sen obstáculos; lanzamentos de xavelina, peso, disco e martelo; saltos de lonxitude e altura; carreiras de resistencia; xogos multiatléticos e carreiras de remudas. As probas desenvolveranse de 18.30 a 20.30 horas para as persoas menores e a partir das 21 horas para as adultas. Os nomes gañadores virán dados pola suma total das competicións.
O V Campus de atletismo é unha das citas deportivas máis sinaladas do verán na comarca. Está organizado polo Club Atletismo Ordes e o Club Atlética Silva, os cales contan coa colaboración dos concellos de Ordes e Cerceda.
